難尋淨土

馬交埠，怪事經常有，話說神靈清靜地，一班聖潔人，近日嘩聲四起，話佢哋靜土，俾人整污糟，而整污糟佢哋笪地人，竟然係新開檔干淨行門。最奇係，被告「疑犯」，竟然出銀兩請人，話要證明自己係「冰清玉潔」，但係又唔肯攞出證據，蠱蠱惑惑，總之呢單嘢認真撲索迷離，好容易諗穿個頭。諗人唔死，亦會笑死！ 話說呢個神靈清靜地，座落係馬交埠個島仔度，原來係綠水清山，魚遊鳥唱，清水一灣，風平浪靜，阿茂細路仔嗰陣時，仲喺嗰沙灘仔度剝光豬，游過裸泳，因為嗰度確係好似世外桃源，只有啲修士同啲村民喺度淨修及過安樂日子，唔單只環境清潔，連啲人嗰腦，亦特別干淨。 但係好景不常，喺三幾年前，官家喺嗰度話填海，經常倒埋晒的污灰同臭坭，搞到烏天黑地，重臭氣薰天。又唔知點解，自從倒灰坭之後，嗰度啲人經常生怪病，唔喺無端端生鼻息肉，就會變成鼻敏感，更加唔少人患上氣管炎。唔通撞歪！？就算啲修士同教徒猛咁念經，上帝好似都打救唔倒！ 凡夫俗子一眼就睇倒，呢啲怪病，當然喺毒灰、污坭所引起！但係，專門搞干淨環境「干淨衙門」，就偏偏睇唔到，等到班修士教徒嘈上門，先至話要查清楚咁話。 佢哋點查？原來佢哋自己出銀兩，請人去攞「證據」，嗰「干淨」老爺更振振有詞咁話由數字「說話」。 但係，啲修士教徒同老爺攞啲「證據」出嚟睇，搜穿嗰袋，老爺都攞唔出。一妙，更妙係，「疑犯」出錢請人調查，證明自己有「冇」罪，調查過程，又冇他人監察，「鐵證」更攞唔出，咁調查結果。你信唔信!?簡直係世界級荒誕劇！呢啲「好」戲，只有喺蓮花地上演，而且喺「好」戲連場，主角更多數係啲以民為本尊貴僕人演出，你話蓮花哋幾有娛樂性，幾咁吸引遊客嚟參觀，咁樣演落去，國際旅遊娛樂名城，宏偉目標，指日可待，你話喺咪?! 阿茂