蓮花寶地轎務不易搞

管「轎」大局長，日昨出善言，重提公交轎專道，計劃更完善，希望期以四 年，多建停轎場，安置沿線道邊之「轎」，配合專道推行。蟻民聽佳音，多拍掌稱允，唯所費之時，是否太長，希望大局長，實踐大司長誓言，「急市民所急，想市民所想」，尤其係「急」！ 管「轎」大局長，不愧為智多星，頭腦甚科學，芸芸局長中，平日所言，亦引用最多科學，「摩登」嘅詞句，顯得佢嘅寶「腦」，真喺最具「科學思想觀」者。如果胡老總喺蓮花地座鎮，肯定佢官運亨通，連升九級，好快彈升到天頂。 皆因管「轎」局長日前係議事亭，發表偉論，彈出計劃喺蓮花地，設條公交轎道，由蓮花莖直通到蓮花頭，如果佢嘅美夢成真，到時蓮花地嘅公共轎，將會暢通無阻，可能抬得快到會飛，聽到Ｄ蟻民眉飛舞，以為將Ｄ 公共轎可以擲咗嗰殼，唔駛行到好似蝸牛咁慢，嘥晒Ｄ光陰。 可惜阿茂好講唔講，除咗讚大局長英明，眼光遠大外，重問咗一句唔好聽嘅說話，設咗公共轎道，趕走晒現時停喺道邊Ｄ轎後，點樣安置哩千幾頂道邊轎？唔通都要佢地升「天」，變成「飛天神仙轎」？變成醫好頭暈又生「腳痛」？ 大局長日昨終發話，佢會用四載嘅光陰，做Ｄ停轎場！安置哩班「路邊孤兒」。大局長真係抵讚，即刻「補鑊」。不過，蟻民會問，要用四年？先搞掂哩班「路邊轎」，時間會唔會太長!？因為依家出世嘅ＢＢ 仔，四年後已經識行識走，甚至讀高班嘞！而四年後，蓮花地又會多咗幾多轎!?佢地又點樣安置？ 大局長雖然一片苦心夾善心，希望搞好蓮花地一塌糊塗嘅轎事，但係用咁慢嘅速度，會唔會進度重慢過如今蓮花地嘅蝸牛轎，佢可唔可以學佢老勢誓神劈願咁講，「想市民所想，急市民所急」，唔喺淨喺得個講字，重要誓願成真!最緊要重喺個「急」字！ 當然，如果要真係搞好蓮花地概轎務，唔喺淨喺大局長豪言壯語，啪吓心口就成功，重需要佢上頭點頭，夾好多同僚幫手，甚至可能要蓮花尊者降旨，先至有可能好夢成真。故此，阿茂同全城黎民，一齊求神，祈禱兼拜埋「阿拉」真神，祈望各方天尊，一齊保祐大局長，事事亨通，好願事成，盡快搞好蓮花地啲轎務，咁就劏雞還神，善哉、善哉，真係功德無量嘞!                                    。阿 茂。