密室簽約‧睇見心寒

近日天氣，陰風陣陣，寒風冷雨，冷得全城震騰騰，星斗蟻民，渴望陽光，暖暖身心。事與願違，管轎老爺，避開陽光，與大圓外，簽定約契，數十億交易，圓外多得益。行事方式，有悖常理。更加陰霾。先斬後奏，避開大眾深究。令星斗民，能不心「寒」。 話說管轎局，昨日同三間公共轎大圓外，係管家婆衙門，「勾手指尾」，請公共轎D伙計，同蓮花地D父老抬轎，一抬就七載。祠堂當然唔會「刻薄」公共轎D圓外，「過水」近五十億兩銀。 呢單買賣，擺明係「肥仔水」。公共轎圓外，抬轎當然封硬「蝕本門」。圓外想唔「大肚腩」都幾難。 銀兩俾咁多，D轎點抬法？坐邊種轎…‥種種細節，應該要話俾D父老知，就算唔公開講，「大拿拿」幾十億兩銀嘅開銷，簽「賣身契」，甚至同金蓮花嘅父老有關嘅事，亦都好應該通知啲時間佬嚟睇吓，以示公正。更何況大老爺成日誓神劈願，「陽光施政」。但係，大老爺偏偏喺咁大手筆交易嘅重要時刻，就「咁啱得咁轎」，靜雞雞閉門「速簽」，實行先斬後奏，等到D衙門關晒門。又喺D時聞佬多數食緊飯嘅時候，先又時間「夾」得咁「準」。傳張紙仔過嚟，俾你睇睇，過少少「料」，等D時聞佬收到料，愕晒然，已經無機會去問，想「補鑊」都難，猛拍檯問，咁大「劑」嘢，點解搞得咁「神秘」？！內裡胡蘆，賣乜嘢藥？做得咁鬼鬼祟祟，公家嘅大事連時聞佬都避開，唔想人問，係咪心有屎！？唔見得光！？ 欲蓋彌彰，大老爺做嘢，歷史紀錄，唔多光彩，過去有得賴，「龍」做檔箭牌，乜罪都揹晒。如今新祠堂，號稱耀陽光，實際行為，卻佈陰霾。應咗大宰相，訪蓮花地嗰陣，大發金句言，台上說一套，台下唔同做，際此寒潮下，全城嘅父老，又睇陰霾戲，你話唔心「寒」。 

  ‧阿茂‧