金牌御令有何用

阿茂好激氣，皆因屋企個賓妹，用嘢嘥得好離奇，洗潔精，石油氣，冷氣機，開機嘆世界，直到冇人都唔熄機，簡直洗腳唔抹腳，成個二世祖咁嘅脾氣！ 正激到七孔出煙嗰陣時，啱啱扭開個電視機，時聞妹報時聞，話蓮花尊者，特別擲下御令，叫啲公差，以後出更，按令洗銀兩，唔好做花花公子咁話。 不過，阿茂睇真Ｄ，嗰條御令又幾咁複什，又話乜嘢選擇制度，又乜一般制度，乜嘢制度之中，又話可以係邊個制度中攞番幾多，跟住又話乜實報實銷，嗰御令又話出更之前，幾多日內，又話要去格吓價，重話要貨比三家咁交關！ 點解要搞得咁麻煩！好似唔隆重啲唔得咁款，無他，正如天賜高話齋，因為要回應吓啲父老嘅嘮嘈之故也！皆因篤數公早前篤爆啲大老爺公差，出外「公幹」，要發皇帝夢，瞓一晚客棧，每個老爺都嘥成萬幾銀，重多過阿婆去拱北買一年餸嘅銀兩，我哋啲尊貴老爺，係唔係都排晒隊去外邊「公幹」，成年流流長，究竟嘥左幾多銀兩，學啲花花公子咁，雖然祠堂水浸，咁樣嘥法，金山都陸沉也!唔怪得啲父老重嬲過阿茂。 啲父老嬲到震，大法師太同公差頭又有新招嚟拆，話去桂枝學法，點知又好學唔學，桂枝啲簡單，明晰規條，就睇唔到，結果又推啲阿茂造餅出嚟擋擋，做做騷又算數！ 點解啲蓮花老爺咁鍾意嘥祠堂啲銀兩？點解啲大法師成日都作唔到啲妙法出嚟管啲花花老爺，無他，觀點與角度，問題出在腦之故也，因為祠堂豬籠入水，成日嘥都洗唔晒。 究竟啲老爺當祠堂啲銀兩係佢祖先剩落俾佢去洗嘅，還是係阿公嘅？而以民為本啲老爺係公僕，還是蟻民係老爺之僕？若果蟻民為僕，咁老爺嘥光晒祠堂啲銀兩，唔單止係啱嘅，啲蟻民重要嗱嗱聲夾多啲銀兩，俾啲老爺出去發皇帝夢嘞！使乜咁多御令咁多餘，你話係咪又阿茂做餅!?                                        ‧阿 茂‧