走犯的啟示

蓮花地，呢兩日，「阿蛇」好激氣，皆因又走犯，「阿蛇」唔止傷，更加難「落場」。連日偵騎出，全力去緝犯。

阿茂則建言，若果搵到犯，唔使送佢入監倉，應該高官、厚祿，係巡捕房，教授「鐵漢」。

點解咁提議？阿茂唔係「傻更更」，而係知道個犯底細，同埋佢「脫險」時嘅「風光」！

話說個犯出身係內地嘅河南，果度出名嘅係「綠林好漢」，加上嵩山少林寺，所以河南人除咗打得，做起案來，重喜歡食「大茶飯」，更加渾身是「膽」。

看官睇睇，日前個犯掙脫羈押時，以一擋三，拚開三個打仔「阿蛇」，由電梯三樓咁高，飛躍而下，已經露出，佢確「身手不凡」。

即使「阿蛇」，撲前緾佢，亦被摔低，佢更想「創收」，搶埋「阿蛇」支「炮仔」。你話佢本性，重狼過生番？

「阿蛇」爬起身，「鳴炮」嚟「窒」佢，竟然當「冇到」，咁重唔係，渾身是膽？

呢個「故仔」，話我哋知，「阿蛇」雖然係威龍級猛探，但三個猛探，鬥唔過一犯，可見個犯，「質地」非凡！聴到槍聲，明知被「啪」，腳仔唔軟，視死等閒，可知佢拚勁，係幾咁勇猛。

功夫了得，身手不凡，出手準繩，行動敏捷，視死如歸，臨危不惧，這種品質，搵遍全祠堂，都搵唔番！

這種「良才」，若在龍故鄉，最佳職位，當屬「公安」，加上個犯，係八年前，廿幾歲仔，已過江犯案，正所謂：唔係猛龍唔過江。若把「優之良品」，改邪歸正，適當任用，在「求才若渴」嘅蓮花地，最啱就係，「阿蛇」學堂，教番Ｄ兵，蓮花猛探，則更威龍。

阿茂又造餅，建議一哥，唔單止要廣發偵騎，三顧「草蘆」，誠邀「著草猛漢」，「出山」當「兵」，以身示範，身教言教，育蓮花警。成真鐵漢。則功德無量矣。因少左個猛賊，多番班勇兵，更加安定與繁榮，有益加有建設性。

再者，若然肥崔，有幸「番醃」，再擁寶座，必當慶功，又可頒多個，英勇、功績、勞績夾特殊貢獻蓮花大十字勳章！

‧阿茂‧